Wednesday, January 6, 2010

رحلة رأس السنه





احس ان السفر لوحة
يعانق لونها ~ برواز
و تنادي بضيها ~ غاية
تساير فينا... منهو فاز؟


~النور



انا و قرار متأرجح بين السفر ..او الــ لا مفر
و كلاهما حتمي الذهاب !؟
وبين صفحات هذا العام التي ستنطوي
هناك بين ارجاء ~ تفاصيلهم و فرح يمتزج بارهاق
فُصل لهم أو لتلبية دعوة تختلس الفرح بغته والصمت أوسكته

نعم ..فقد اتخذت قراري ..بالمفر ..اقصد بالسفر
لــ اربع ايام في سباق عبر الزمن
فتزداد رحابتهم .. و يزداد غرورنا
فضيافتهم ..فور هروبنا



الخميس .. بداية السفر و الوصول .. فنهاية العام و ارغام الاصول
عشاء قيم ..سٌفرة راقية جدا ..في منتهى الذوق بتبادل مواضيع قيمة
في ألفة حديث مطول رغم تأخر الوقت... فلأول مرة اتناول
اطراف سفر/ نسائي المذاق

فــ هو جميل الى حد الملل
سريع اللى حد الكسل
طويل الى حد الخوف
كما انه متعب الى حد البكاء



الجمعة ..ثاني ايام السفر ..اجتماع آخر معهم
و قرار الذهاب الى المرزعة .. تلك المزرعة العتيقة
بتفاصيل اخضرار يريح النفس مع أمتزاج الوان السماء الزرقاء
بين اسطبلات الخيول الاصيلة ..و تلك السدرة التى ترويهم ~ اسرار
و اعتذاري عن الحضور .. فقد ذهبت الى ذلك البعيد نحو
مربعات تحمل اسماء فصلت للبيع على اهواء مشتري فقد الهوية
و استبدلها ببطاقة أئتمان محدود المدة

الى ان ابتدأ المشوار

غداء ..مشي ..تعب ..ثم مشي.. شراء.. بضاعة
ركود .. قهوة .. قلم ورقة .. رسمة ..طاقة ..حوض اسماك ..تبضع
جوع .. مزاج .. عشاء .. ومن ثم نعاس .. يغلبه نوم بدون تفكيـــــــــــــــــر




السبت .. يوم حضور المناسبة .. ترتيبات و اداء الواجب
و ترقب التفاصيل.. اختلاف تجهيزاتهم .. و اهتماماتنا ...انشغلنا باتمام
الشكل النهائي استعدادا لاضفاء الرتوش الاخيرة الى ان يصل
السائق الى الفندق الساعة 9 ... في طريقنا الى القاعة يبدأ حوار حول
توقعاتنا لترتيباتهم ..و هدايانا لهم و اختلاف نكهاتنا جميعا


من ثم .. نصل

تلك القاعد الكبيرة ..ذلك السقف العالي ...امتزاج قطع التور
و ذلك الدانتيل المناثر باختلاط الورد الابيض و تداخل تفاصيل الغصون
بتنسيق متناهي ... وتلك الطاولات الزجاجية النصف دائرية
رقي ~ بياض الاطباق بامتزاج رتوش ذهبية ملكية.. وتلك الاضواء المرصعة
بكل زاوية .. بمنظور ثلاثي الابعاد.. الى تفاصيل الشاشات المسلطة
على الجميع لتضفي جمالا مفصل
حضورنا و تأني الدخول الى ارجاء قاعة ملت ~ سواد عباءاتهم
نعم .. من تقاليدهم ابقاء العباءة ... ونحن من تقاليدنا اظهار حلتنا كاملة
.وفق..
الى ان اسمع الجميع يتساءل من هؤلاء ؟
و يرد البعض ..اكيد من الكويت :) نبتسم لهم
تقاليدنا اختلفت فمن يفهمها ~ بالانفتاح الظاهر
و من يصفها ~ بالظهور المفتوح
كل يرانا
"مختلفين "
كما اني احببت اختلافهم ..و عباءاتهم الراقية
نجلس .. تتوالى اغاني الجسمي/الماجد الخاصة المغناة خصيصا لهم
بلا اي حركة منهم .. نستغرب وجود ~ بست الرقص بدون
اي رقص معللين .. ان اي بنت تمر عبر ممر الرقص
فقد فقدت ادبها و هيبتها !! و من ثم بريق حلتها
نصمت .. لنكتفي بتناول الطعام المقدم و تلك العصائر .. مقبلات
مأكولات بحرية .. و من ثم اطباق رئيسية ~ لذيذة
ننشغل بكل هذا الى قدوم المحتفى بها ~العروس
تدخل بحلتها و بساطتها ..على شدو ~ الجسمي
الى ان تصل الى ~ الكوشة بعد طول مشي متأني يتعبها
وبعد اقل من ساعة يدخل المعرس بسرعة متناهية
فــ يصل اليها اسرع و ينسى من هم معه
والده ~الهيبه
و اخوانه ~ المماليح
وآخرهم ~ امه الجميله و دمعاتها تلاحقها


عند هذه اللحظة
ينطلق الجميع الى باب الخروج كأنها اشارة بضرورة
الذهاب تماما كما ~ الهدة فتجمعهم بجانب الباب يفقدهم
جمال اناقتهم التي احبتها الى ان رحل الجميع لم تبقى سوى الاهل
و نحن و المعرس و العروس ..... ~ وخزيـــــــــــاه
ليستعد المعاريس بالتصوير .. و التأني فيه
و لم يسعنا الا زيادة التركيز بهم ~ فلم يتبقى سوانا كي نستمتع
جدا بتلك التفاصيل
الى ان خرجا المعاريس .... ربما خوفا منا !! او خوفا علينا


بعد ذلك يزداد ابداع الكوتيين ~ نحن
بتخريب الامارتيــين ~ اهل المعاريس

عذرنا " لازم نحلل اللي لابسينه..وحسافه على الاغاني " و صار اللي صار




الاحد ... العودة



.

.

.

.



ولهت عليكم










50 comments:

الحــــر said...

الحمد لله على السلامة

النور نورت

:)

NOIR said...

النووور
ولكم باك
و الحمد لله على السلامه
انشالله ما نسيتينا بالصوغه
عاد و حده من حبيايبي يايبتلي اسواره منوره ايدي من دبي

----
تعليقي على النص
START WITH UR NOVEL!
وصف و سرد لذلي للاحداث
يعللن بدايه روايه قادمة..


(فقد ذهبت الى ذلك البعيد نحو مربعات تحمل
اسماء فصلت للبيع على اهواء مشتري فقد الهوية و استبدلها ببطاقة أئتمان محدود المدة )

اعجبني هذا المقطع

فهناك من يشترى الفشل
و اخر يقيده بمحدودية بدين قصير الامد

و انا عن نفسي.. اعتقته بلا ثمن
الله يوفقك
KEEP GOING ..

AL Ro0oR said...

وأنا أقوول ليش الإمارات كانت منووره :p

فدييت أهل الكويت أنا !

أول ماقلتي من تقاليدهم أبقاء العباة ضحكت لوول !

ذكرتيني بمرة رحت فيها روضة بالكويت مع ان لابسه الملفع الكويتي بس تميت بالعباة فترة لان ماقدرت لوول مو متعودة حتى أقول لحبيبتي كييف جي تنزلون بالدوام خخخ بالأخير نزلت العباة لوول بس كششخة !

لا لاا لاتقوليلي ع فصلة الكويت الصراحة لوول تونسون وحدي مشتاقتلها لوول

احنا احس حتى رقصنا اتكانة لوول مانوصلكم :p

سولفت كثير بس استانست خخخ

وحياكم الله دووم ياأهل الكويت :p

^_^

شاي الضحى said...

الحمدلله على سلامتج

اي والله لازم نحلل الي لابسينه ;p

jasem said...

الحمدلله على السلامه
وعودة ميمونه
من سفر اللامفر
عدتي منه بتفاصيل متناهية في الدقة
فشكرا على تسفيرنا مجانا
عبر لوحة ببرواز
:)
وزين سويتاو فرحتاو وحللتو اللي لابسينه بس ماتوقعت الاماراتيين امعقدينها جذيه
انزين قوليلي يوم رجعتاو
جم مرة انسألتي السؤالين العريقين من الجنس الناعم حق اي وحده رايحه عرس
اشلون العروس حلوه
اشلون العريس مملوح؟

:)

Shaikha said...

الحمدلله عالسلامه يالنور ..

انا يعجبني بالاماراتيات تمسكهم بالعبايه لأقصى حد .. بس مو بعرس عاد!
عرس يعني عرس .. غريبه

بس كـ تنظيم القاعه والضيافه وهالأمور ،انا سمعت انهم كشخه ..

المهم المهم ، السؤال المعتاد ..
منو احلى العروس و المعرس ؟
;p

Engineer A said...

الحمدلله على سلامتج :)

Reem said...

الحمدالله عالسلامه يالنور ..

عاد حلاة العرس بالكشخه و الرقص ، و لا شلون عرس ؟ .. عموماً حبايب والله أهل الأمارات ، و زين حللتوا اللبس ;p

و على قولة شيوخ ، حلو بشعب الإمارات تمسكهم بـ العباية / الدشداشة :)

و مبروك للعروسين ..
الله يوفقهم إن شاء الله

سمو الأميرهـ ..ツ said...

أول ما طريتي العباة
قلت أكييد
كنتي منورتنا بالأمارات
لوووول

اممممم

هي عادة عندنا لو العرس للمعارف أو ناس نعرفهم من بعيد لبعيد
نلبس عبي
بس ما يغرج نتكشخ
أما أعراسنا
فبدون عبي
******

سردج جداً رآئع و مشوق

:)
تحيااتي

اقصوصه said...

وانا اقوووووول

ليش البلاد كانت منوره؟

انزين لو عطيتنا خبر ع الاقل

عشان نقوم بالواجب :)

sweetya said...

الحمد الله عالسلامه

SCRIBBLE ..♥ said...

سرد ممتع جدا
والحمدلله على السلامـه

:)

why me said...

يا حلوج


:)



صباحج وررد

chandal/danchal!! said...

الحمدلله على السلامة وكل عام وانت بخير

:)


والله يا نور ساعات ودي نكون مثل اهل الامارات, من شي(ن) اشوفه بالعروس

ARTFUL said...

الحمدلله على السلامه

:)

aL-NooR . said...

الحــــر
***************

الله يسلمك

شكرا ..النور نورك
:)



******************

aL-NooR . said...

NOIR
**********

اهلين ..الله يسلمج
و اذا على الصوغة توصبج ولا يهمج
;p

O about the novel !
الله كريم ..احس يبلها تركيز محكم
other than my poems love


و على البارت اللي اعجبج ..
اول شي شكرا
ثانيا
تحليلج صحيح جدا
و انا عن نفسي.. اعتبر اي شرايستحق مقابل اما يضيف لنا ام لا يضيف لا اطلاقا ...عوضا عن اي هوية مسروقة

شكرا

***********************

aL-NooR . said...

AL Ro0oR
***************

حبيبتي الامارات منورة بأهلها
والله انا فديت الامارات و اهلها :*
صج صج راعيين واجب خجلونا

لا المشكلة حسيت نفسي فري و لا امسوية شي غلط
;p
بس لما دروا انا احنا من الكويت
استانست عشان ناخذ راحتنا :)

اي واذا فصلنا فصلنا
يكافينا الشر ":P
بس هم اللي يبي التكانه يلاقيها و اللي يبي الفصله هم يلافيها

يا حلو سوالفكم ..و رمستكم
و عاد لي يتتي الكويت مو تنسين تخبريني
:)

*****************************

aL-NooR . said...

شاي الضحى
**************

الله يسلمج :*
آخر شي حللناه عدل
ما انتوصى
:p

**************

aL-NooR . said...

jasem
*******

الله يسلمج من الشر
عدنا والعود احمد
سفره بلا مفر ..
صارت اداء واجب محبب لي مستقر
و ان كانت لكم مجانية
ما قلتلي اي طيران ؟

لا مو معقدنها بس جدي سلكهم
و ياحلوهم و يا حلو سلكهم

اممممممم سؤال صعب جدا
لاني ما اذكر جم وحده
اسألتني من كثرهم
:P

بس العروس
مملوحه
و المعرس املح
:P

عسى ربي يوفقهم و
ويولف بين قلوبهم و يجمعهم على خير


******************

aL-NooR . said...

Shaikha
************

الله يسلمج حبيبتي :*
عاد تصدقين اني توني
كنت عند و قاعدة
اقرى سوالف البنات

اي والله تمسكهم بالعباة شي وايد حلو
تحسين مفتخرين بتقاليدهم

:*
يا حلبي لهم

اي والله كشخة ..و على مستوى
لانهم بعد شيوخ الامارة بعد ما شاء الله

امممممم
العروس مملوحة ..و المعرس مملوح
بس جنه اهوا احلى
هههههههههههههههه

*********************

aL-NooR . said...

Engineer A
**************
الله يسلمج :)


********************

aL-NooR . said...

Reem
***********

الله يسلمج يالريم

اي الله وكيلج حللنا البدلات
و كل شي ..اقولج قاموا معانا :)
يا حلوهم

اي ما شاء الله
متمسكين فيها تحسين فخورين مثل ما قلت حق شيوخة ..

الله يبارك بعمرج
:*

********************

aL-NooR . said...

سمو الأميرهـ ..ツ
***************

يا حلو الامارتيين و الله
والله الديرة منورة بأهلها

و على العباة الاغلب لابسين و صاجة اهل البنت و القراب منها لابسيين درسس

لا لا اذا على الكشخة ..ما عليكم خلاف

نورتيييي :*

***********************

aL-NooR . said...

اقصوصه
************

منورة بوجودكم :*
اي والله جان تشاوفنا :*
على شرط لي يتي الكويت
انا اقوم بواجبج :*

نورتيييييي :*

********************

aL-NooR . said...

sweetya
************

الله يسلمج
:)


***************

aL-NooR . said...

SCRIBBLE ..♥
*******************

الله يسلمج
ووجودج الرائع
شكرا

**************

aL-NooR . said...

why me
***********

حلت دنياج
:)
صبااااااح الخيرات

******************

aL-NooR . said...

chandal/danchal!!
*******************

الله يسلمج ..و انتي بخير و نورية الحلوة بخير ..ها بشري شخبارها ..و شخبارج انتي معاها

اي والله الحلو فيهم ..ما عندهم الكلافة
ولا الهول اللي عندنا ..
سبحانه الله كل(ن) له سلكه
:)

****************

aL-NooR . said...

ARTFUL
************

الله يسلمك
:)


************

jasem said...

هههه
أي طيران؟
بعد مايبيله
طيران النور الأزرق
:)

aL-NooR . said...

jasem
******

ههههههه والله جان بخت .. :) عندي طيران
جان كل تعليق بتذكرة

و تذكرتين وقابلين للزيادة
حق اللي عندهم واسطة


مع تحيات
طيران النور الأزرق
:)

*************

ميمة السبيت said...

** ايه والله عاد يبيلنه حفلة احنه من بدت السنه اللهم يكافي و كل ساعة نسمع خبر مو حلو

الحمدالله على كل حال الله يديم افراحكم و افراحهم و انشالله الفال لج يالغالية و نزفج عروس و تكون استكانه حامل و الزين مالجة و فشوووش توها مخطوبة و ام الفناتق للحين تحوووس تشتري كريمات و سنفرة لووول و سلة بالنفاس ماقدرت تيي

..pen seldom said...

=)

أستمتعت كالعادة بما قرأت ..

حمداً لله على سلامتكِ عزيزتي ,,

وسنه سعيدة عليكِ يارب ..


أرق التحـايا ..

سلة ميوّه said...

حمدالله عالسلامة وتو مانورت الديرة


ضحكتيني بالبوست لانج جنج قاريه افكاري
من جم يوم
انا ورفيجاتي متيميعين ونسولف بنفس السالفه بالظبط...
بس وحده فينا مسافره عرس بقطر والثانيه بالامارات

وماشالله عليهم نفس ماقلتي..
الترتيب
والذوق
والرزة..
والبست الفاضي :)
وعلى قولتج قميضت التساريح والتذكره وانا اختج
لازم انشيل العرس :)

عموما بالعافيه عليكم وعسىى ايامكم كلها افراح وسعادة

وعسى الله يقر عيون كل من يحبج بعودتج مثل ماقرّت عيونا

حبي:**

Anonymous said...

أكو وحده مستحيه من النور وتبي تنخش

:$


\
NoDa
\

روميـه فهد said...

عزيزتي.. عساك بخير وعافية..

جميلة هذه التفاصيل آنفة الذكر..
والأجمل أنّك فيها بلا شك..

الحمدلله على السلامة :*

دمتِ لمن تحبي

روميـه

Cesc said...

الف حمدلله ع السلامه ,
ولهنا عليك ,
امممم احلى شي بالموضوع " هذيل اكيد كويتين .؟ "
مادري تصير معاي بعروس كثير برا الكويت ..

متميّزين : )*

jonoon 3aqel said...

هههههه

ضحكت على " نحلل اللي لابسينه و حسافه ع الاغاني"

:)

جميل هو الاسلوب و السرد..

ما شاء الله


عسى ايامك كلها سعادة و فرح و راحه

تحياتي

Manal AlNuaimi said...

يا هلا ومرحبا فيج بالامارات .. وتراها اكيد نورت ..

اللي قلتيه هذا هو الوصف الصح لاعراسنا ..


واللي قالوا ما ندري ان الاماراتيين معقدينها؟؟؟ لا والله مش معقدينها ولا شي هذي عادات وتقاليد نحن ماشين عليها ..
:)
وان شاء الله ما يكون اخر عرس لج بالامارات.. ولا اخر زيارة ..

aL-NooR . said...

ميمة السبيت
*************

اي والله نبي حفلات مع
ان موسم بس نبي ناس قراب ..اونس

حبيبتي :*

و يا حياتي استكانه حامل زووووغة و
زيووووون يا حلوها ..و اللي تحوس بالكريمات و المخطوبه .. وناااسة ترى ..لوية بلوية ..لو كل هذا جان نسكر البلوق حتى اشعار آخر

:P

ولهانين :*

*************************

aL-NooR . said...

..pen seldom
*****************

بحضورج النص اجمل

الله يسلمج ..
و على سعيدة الحمدلله سعيدة كفاية اهل الامارات :*

نورتي :)

********************

aL-NooR . said...

سلة ميوّه
*************

الله يسلمج يالغالية
منورة بوجودج

صج والله ..حتى انتوا مسولفين :*
يا حلوج و يا حلو سوالفكم

يبيله سفرة قطر ..
بشووووووف ترحين معاي ؟


واذا على العرس لا تحاتين شلناه ..و لي نويتي عرس قطر ..قوليلي عشان نشDGه
;P

‘عسى ايامج كلها افراح قولي امين
حبيبتي ..بويه نبيج يالغالية :*

aL-NooR . said...

روميـه فهد
************

الغالية روميه
طمينيني عنج :*

كما الأجمل أنّك فيها هنا يا رومية ..

الله يسلمج
:*
نورتي و لا تباعدين


*******************

aL-NooR . said...

Cesc
*******

الله يسلمك من الشر

من زمان عنك
:)
اي والله مثل ما قلت متميزين
so special

********************

aL-NooR . said...

jonoon 3aqel
***************

اهلا بالغايب الحاضر

اي بعد لازم و ضروري نحلل كل اللي لابسينه
:p

الجميل تواجدكم
شكراااا

*************

aL-NooR . said...

Manal AlNuaimi
******************

يا هلا و مرحبااااااا
بأهل الامارات :**
حبيبتي منورة فيج

لا لا ولا معقدينها ولا شي كلن له سلكه ..و يا حلوكم و يا حلو سلكم و تقاليدكم الحلوة

و الاحلى ان متمسكين فيها الصراحة

ان شاء الله مو آخر عرس
و المرة الياية ..تعزميني انتي و افصل عباة شرايج ؟

;p

*****************

Manal E. AlNuaimi said...

النور .. لما بعرس وبعزمج وقلتي انج راح اتييين .. وعد عباتج راح تكون عليه ومش العباه بس ، طلعتج من الكويت ولحد ما تدرين لها بالسلامة بعد عليه ..

بس انتي قولي يايه والباجي علينا ..

ومساج ورد ..

aL-NooR . said...

نوداااااااا

سقط سهوا والله
كلش ولا نودا :*

ولهانين ..و كنا متوقعين نشوفكم بالامارات بس بعض الناس كانوا مختفين عن الانظار ..

المهم ..ان ييتي الكويت و ما دريت راح اسويلج جريمة :**

******************

aL-NooR . said...

Manal E. AlNuaimi
*************************

اييييييي ..اذا عرسج ايي و اكون من اول الحضور ..يكون لي الشرف اصلا
لا ايي بدله و اييب معج العباة ولا تحاتين ..و اذا حسيت الوضع يستوجب عباة للبستها بس اذا لا
ماراح البسها ..كفاية يعرفون اني ياية من الكويت

:*


*******************